February 19th, 2014

Der Powerwalk ist bereits seit Tagen in Gang, in aller Ohren und Munde, und alle GEHen mit. Alle? Ja, wirklich alle! Beim POWER WALK zählt bekanntlich jeder Schritt, auch wenn er nur deshalb GEHgangen wird, weil der Maserati gerade in der Werkstatt unabkömmlich ist. Ob arm oder reich, ein POWER WALK schafft immer neue Eindrücke – und Begegnungen jedweder Art sind praktisch frei Haus selbstverständlich. Als Schmankerl für das POWER WALKwochenende hier also ein weiteres WildUrb-Dialekt-Spezial, diesmal aus Döbling.

 Na seawas! Do hob i’s jezzn owa entrisch gnedig, dass i Richdung Hoe Waate aufekumm. I deng jo nua, owa kaum steed da Masaratti zwaa Tog in da Weagstood, erfoad ma, kau ma so sogn, von den Niedarungen des Lebens mea, ois das am Rechd is. Waun ma des im Feansegn siichd, do is jo lustig. Owa wias do undn baa da Uubaunstation zuageed. Na, de Wööd steed nimma laung. No, mia sois rechd sein.

Des is a richtiga „POWER WALK“ – wia ma auf Neideidsch so sogd – do auffe, da scheißd sich doch da Varein a! Dabei is da Aussichdsweg goa ned so laung. Owa mit Ross untam Ollaweatesten tut ma sichs doch leichda ois z’Fuas. Na, aufregn brauch mi owa ee a ned. Besser z’Fuas ois im Bus. De Blumal und Buschn do riachn no imma guad, a wenn do scho seid ana Ewigkeid da Koal-Maax-Hof eipflanzd steed.

Den Pidralonschweissgeruch aus da Uubaun hob i jo no imma in da Nosn. Des Fuaßballstadion owa – Godd seis gedangd – nua mea klaa. De Omama hod ma joo dazööd, dass do in de guadn oidn Neinzeenzwanzgajoa ofd hundadtausnd Proledn bei aan Spüü zuagschaud hobm. Hawedeere, samma froo, dass da östarreichische Fuaßboi so baanaund is. Allaa de gaunze Fauna und Flora um des Stadion umadumm! Schood weas, waunn des heid nu imma so a großes Stadion wia domois sein täd. Mia sois jo rechd sein.

Peandnagassn no duachgangen, schon steed ma obm auf da Hoen Waate. Schee is do. Und riachn duats a guad! Aaah! A richdiges Dahamgfüü griagd ma do, wenn ma ba da Medeorologischn voabeikummd. Hihi, vo do haarom mochns jo aa des Wedda. Friacha hobms glaubd, des Wedda mochd a oida Mau im Himml, jezzn glaubns hoid, des mochd da Quaxi auf da Hoen Waatn. Owa ob de do auffeschaun oda ned, mia is des wuaschd. Solaung dii Tourisdn ned gegn mei Willenmaua ludln, is mia nemlich ollas rechd heid.

’S Weeda is aa so schee heid. Jezzn kaun I maas aussuachn. Die Kinda studian no mindesdens vier Stundn auf da Sails-Menedscha-Akademii glei do undn. Da Gatte hod sowiiso ois Aufsichdsrodvoasizzenda mid da Aufsichdsrodvoasizzendnsekretearin zduan. I könnd jo wiaglich no a poa Schridd weidageen, waunn i schoo am Masaratti vazichdn muaß. Owa waun i doo an da Egipdischn Bodschafd voabeigeh, a bisserl klamm wiad einem da schon, muss i sogn. Zum Glügg oba geeds denen Leidn jo bei uns zguad, ois dass de aa auf dii Idee kumman, a Revoluzzion zmochn. Hihi, do moch i liawa heid mei Geevoluzzion. Na, mia sois rechd sein.

Haha, da schau hea, a echda Wiina! Wia a se aufpudld, nua wäu de betagde Frau do ned schnöö gnua ia Gaggerlsaggerl ausbockn kaunn. No, wiads hoid a scho dii Gichd hobm. Am fidelsden saans jo owa, de echden Weana, waunn sa se im Esbresso Susi driiwa untahoidn, wos denn jezzn Wiinarisch is und woos ned. Hobm hoid no imma ned gaunz den Lueger, Friide seina Aschn, iwawundn, und wuin bestimman, wea a Wiina is. Red a echda Wiina jezzn a Meilinga-L? Oda meagd ma do vielleichd an jiddischn Eischlog? De Ziaglbeem, bumsdi, de hoom easd des angebliche Wiinarische vaschlambd – und von de Sakkbauarischn red i goa ned. Ha! In Woaheid is nua nasales Schönbrunnadeidsch nemlich a echds Wiinarisch! Sui ma nur rechd sei!

Owa, bauawookend wia i do untawegs bin, is dea „Uawiina“, dea do im Häulignsteddapaak sei Oawadsloose oosizzd, ned da Sedladscheg Gusdl, dea mid mia am Lisee Fraunze woa? Dea is owa owekumman! „Gusdl, jo griaß de Godd scheen! Wos mochsd du denn so do? Nu, du schausd owa aus! Wos hod denn dii so midgnommen? Aaa so! Ka Aunstellung mea griagd, nochdemsd im Finanzministerium leitenda Beaumda woasd? A schlimme Gschichd. Soll i da a poa Achderl bei de Heirign auf da Grinzinga Strossn zoin? A, gee hea! Gemma no a Stiggl do auffi. Is scho schee, dass i di wieda amoi siich! Sui ma nua rechd sein.“

(Stunden später) 

Meinasöö, wos es, na ned nana, olles gibd! Do gee i amoi a bissl z’fuas do in da Gegend umadum, wäu da Massaratti hoid in da Weagstood steed. Und do triffd ma aufamoi oide Bekannte, kummd auf gaunz neiche Ideen, und a Weinspizzal is a inklusive. I maan, de Trottua san hoid grindig ois wia. De Sakkbauarischn haun jo aa wiaglich a jeedz Papial aufd Ead. Owa bekanndlich liegd im Wein die Woaheid, und dee is hoid so, dass jeda Schridd zööd, und seis nua drum, wäu da Masaraddi in da Weagstodd steed. Na, mia suis rechd sei!